Jaan Aise KHwabon Se Kis Tarah ChhuDaun Main
jaan aise KHwabon se kis tarah chhuDaun main
shahr so gaya sara ab kise jagaun main
paemal sabze par dekh kar gire patte
ab zamin se KHud ko kis tarah uThaun main
in akeli raaton mein in akele raston par
kis ke sath aaun main kis ke sath jaun main
ek hi si tanhai ek hi sa sannaTa
dasht kya hai dil kya hai kya tujhe bataun main
dekh kaise din aae dekh main na kahta tha
tu qarib bhi aae aur tujhe bulaun main
aaj sab mein ghul-mil jaun mujh ko kya KHabar kal tak
kis ko yaad aaun main kis ko bhul jaun main
kitne kaam duniya ne de diye mujhe 'jafar'
ashk-e-gham giraun main bar-e-gham uThaun main
Jafar Shirazi 
(710) Peoples Rate This