Ranj-o-gham Mange Hai Andoh-o-bala Mange Hai
ranj-o-gham mange hai andoh-o-bala mange hai
dil wo mujrim hai ki KHud apni saza mange hai
chup hai har zaKHm-e-gulu chup hai shahidon ka lahu
dast-e-qatil hai jo mehnat ka sila mange hai
tu bhi ek daulat-e-nayab hai par kya kahiye
zindagi aur bhi kuchh tere siwa mange hai
khoi khoi ye nigahen ye KHamida palken
hath uThae koi jis tarah dua mange hai
ras ab aaegi ashkon ki na aahon ki faza
aaj ka pyar nai aab-o-hawa mange hai
bansuri ka koi naghma na sahi chiKH sahi
har sukut-e-shab-e-gham koi sada mange hai
lakh munkir sahi par zauq-e-parastish mera
aaj bhi koi sanam koi KHuda mange hai
sans waise hi zamane ki ruki jati hai
wo badan aur bhi kuchh tang qaba mange hai
dil har ek haal se begana hua jata hai
ab tawajjoh na taghaful na ada mange hai
Jaan Nisar Akhtar 
(934) Peoples Rate This