Dil Ko Har Lamha Bachate Rahe Jazbaat Se Hum
dil ko har lamha bachate rahe jazbaat se hum
itne majbur rahe hain kabhi haalat se hum
nashsha-e-mai se kahin pyas bujhi hai dil ki
tishnagi aur baDha lae KHarajat se hum
aaj to mil ke bhi jaise na mile hon tujh se
chaunk uThte the kabhi teri mulaqat se hum
ishq mein aaj bhi hai nim-nigahi ka chalan
pyar karte hain usi husn-e-riwayat se hum
markaz-e-dida-e-KHuban-e-jahan hain bhi to kya
ek nisbat bhi to rakhte hain teri zat se hum
Jaan Nisar Akhtar 
(885) Peoples Rate This