Yaadon Mein Rang Bhar Raha Hun
yaadon mein rang bhar raha hun
zaKHmon ko gulab kar raha hun
har sans ek an-suni si aahaT
main jaane kis pe mar raha hun
duniyaen wajud pa rahi hain
reza reza bikhar raha hun
ek lamha-e-gum-shuda ki KHatir
sadiyon ka hisab kar raha hun
maqsud-e-safar hai kuchh to aisa
shoalon se jo guzar raha hun
hai ek junun-e-KHud-shanasi
akasr apne hi sar raha hun
tufan guzar chuka hai kab ka
ab dariya sa utar raha hun
rishte mazbut ho rahe hain
peshaniyon par ubhar raha hun
tha faKHr bahut falak-rasi par
KHud apne par ab katar raha hun
Izhar Varsi 
(723) Peoples Rate This