Na Sail-e-rang Na Sayyara Mahtab Mera
na sail-e-rang na sayyara mahtab mera
hai mere sine mein angara mahtab mera
chhaTi ufuq ki siyah-gard to dikhai diya
payam-e-wasl ka harkara mahtab mera
KHala mein muztarib-o-be-qayam meri tarah
ye mere dasht ka banjara mahtab mera
KHunuk hawaon ka maskan bisat-e-KHak meri
lahu ki aanch ka gahwara mahtab mera
chihaar samt mare aab-zar aur is mein
ghurub hota hua tara mahtab mera
KHud apne nur se karta hai iktisab-e-jamal
wo ek shola-e-awara mahtab mera
tamam raat muKHatib raha mare dil se
wahi sukut ka fawwara mahtab mera
zamin pe dhum mere zaKHm-e-na-shagufta ki
falak pe hasil-e-nazzara mahtab mera
main justuju mein usi kuza-gar ki hun 'ishrat'
hai jis ke chaak ka fan-para mahtab mera
Ishrat Zafar 
(920) Peoples Rate This