Aankhon Mein Mere Gham Ki Taswir Sanjo Loge
aankhon mein mere gham ki taswir sanjo loge
ye baat na sochi thi daman ko bhigo loge
tum tark-e-talluq ko kyun chehre pe likh lae
tum ne to kaha ye tha ye raaz na khologe
jab mera pata tum se puchhenge gali wale
kuchh kah to na paoge palkon ko bhigo loge
sach-much ye batao tum kya mujh se bichhaD kar bhi
in hijr ki raaton mein aaram se so loge
is bhiD mein logon ki main ro bhi nahin sakta
ek tum ho ki chupke se tanhai mein ro loge
ye kaun hai jo 'ishrat' hai mere taaqub mein
itni baDi duniya mein kis kis ko TaTologe
Ishrat Kiratpuri 
(664) Peoples Rate This