Wo Mere Shahr Mein Aaya Munafiqat Kya Hai
wo mere shahr mein aaya munafiqat kya hai
ye us ne aa ke bataya munafiqat kya hai
mere KHulus ko samjha gaya hai nadani
fareb samne khaya munafiqat kya hai
sabhi ko ilm hai Dasna hai sanp ki fitrat
phir is mein us ki KHudaya munafiqat kya hai
wo phir se hath milane ko mere pas aaya
sawal main ne uThaya munafiqat kya hai
simaT ke baiTh gaya hun main ek kone mein
meri samajh mein jo aaya munafiqat kya hai
zamin achchhi lagi sher kahne ki KHatir
so main radif ye laya munafiqat kya hai
Irfanullah Irfan 
(671) Peoples Rate This