Kitne Hi Log Dil Talak Aa Kar Guzar Gae
kitne hi log dil talak aa kar guzar gae
hum apni lash aap uTha kar guzar gae
wo yurish alam thi ki teri gali se hum
tujh ko bhi apne ji se bhula kar guzar gae
ahl-e-KHirad fasanon ke unwan bane rahe
ahl-e-junun fasane suna kar guzar gae
is ehtiyat-e-dard ki wahshat ki hum kabhi
KHud ko teri nazar se chhupa kar guzar gae
tu hi mila na hum hi mile apne aap ko
sae se darmiyan mein aa kar guzar gae
ab to batao hum ko kahan jaoge 'matin'
wo kaun the jo aag laga kar guzar gae
Iqbal Mateen 
(781) Peoples Rate This