Ajnabiyyat Ka Har Ek RuKH Pe Nishan Hai Yaro
ajnabiyyat ka har ek ruKH pe nishan hai yaro
apne hi shahar mein ghurbat ka saman hai yaro
aasmanon mein lachakti hui ye qaus-e-quzah
bhes badle hue rawan ki kaman hai yaro
ek siyasat hai ki hai dair-o-haram ki mahbub
ek mohabbat hai ki ruswa-e-jahan hai yaro
ahl-e-dil rah gae aasar-e-qadima ho ke
zindagi ek shikasta sa makan hai yaro
dil hi shaista-e-gul-gasht nahin hai warna
ye zamin aaj bhi firdaus-e-jawan hai yaro
Iqbal Mahir 
(857) Peoples Rate This