Sab Samajhte Hain Ki Hum Kis Karwan Ke Log Hain
sab samajhte hain ki hum kis karwan ke log hain
phir bhi puchha ja raha hai hum kahan ke log hain
millat-e-baiza ne ye sikha hai sad-ha sal mein
ye yahan ke log hain aur wo wahan ke log hain
KHali paimane liye baiThe hain rindan-e-kiram
mai-kada un ka hai jo pir-e-mughan ke log hain
in se mat puchho ki manzil tum se kyun chhini gai
in ko mat chheDo ye mir-e-karwan ke log hain
gul-faroshi se unhen hum rokne wale hain kaun
hum chaman ke log hain wo baghban ke log hain
apne dushman se hamein 'iqbaal' koi Dar nahin
un se be-shak KHauf hai jo darmiyan ke log hain
Iqbal Azeem 
(1475) Peoples Rate This