Tuk Ek Ai Nasim Sambhaal Le Ki Bahaar Mast-e-sharab Hai
Tuk ek ai nasim sambhaal le ki bahaar mast-e-sharab hai
wo jo husn-e-alam-e-nashsha hai use ab ki ain-shabab hai
wo ghaTaen chhain jo kaliyan jo hari-bhari huin Daliyan
ubhar aain phulon ki laliyan to bajae aab-e-shahab hai
ye do-roza nashw-o-numa ko tu na samajh ki naqsh-e-pur-ab se
ye sarab hai ye habab hai faqat ek qissa-e-KHwab hai
araq-e-bahaar-e-sharab hai wo hi aaj chhiDkenge aap par
na to bed-e-mushk hai is ghaDi na to kewDa na gulab hai
unhen kahne sunne se bair hai jo KHud aaen so to ba-KHair hai
ye gharaz ki zor hi sair hai na sawal hai na jawab hai
kidhar aaun jaun karun so kya mera ji hi nak mein aa gaya
na to arz-e-haal ki tab hai na to sabr-e-KHana-KHarab hai
mujhe wahsh-o-tair se rashk hai ki kabhi unhon ko kisi namat
na sawal hai na jawab hai na azab hai na iqab hai
meri baat man suna dila na to arz o farz pe ji chala
koi un ko Toke so kya bhala ki wo aali un ki janab hai
are 'insha' ab jo ye daur hai teri waza in dinon aur hai
ye bhi koi zist ka taur hai na sharab hai na kabab hai
Insha Allah Khan 'Insha' 
(855) Peoples Rate This