Zindagi Mein Jo Ye Rawani Hai
zindagi mein jo ye rawani hai
ek kirdar ki kahani hai
main ne us se kaha ye aansu hain
us ne mujh se kaha ye pani hai
taza taza hai tera gham 'imrran'
ye kahani baDi purani hai
ek to sar-phiri hawa ki chaal
aur kashti bhi baadbani hai
zaKHm jis waqt ki amanat tha
dard us daur ki nishani hai
sher jis ko samajh rahe hain janab
ye haqiqat mein be-zabani hai
phir wahi hai sawal-e-kaun-o-makan
phir wahi meri be-makani hai
ai KHuda ye wajud ka jhagDa
KHak ka hai ki aasmani hai
Imran Shamshad 
(847) Peoples Rate This