ٹیپو سلطان
نظر سے آج جو گزری ہیں چند تصویریں
وہ دل پہ نقش ہیں جیسے لہو کی تحریریں
بسی ہے جنگ سرنگا پٹام آنکھوں میں
کسی شہید پہ سایہ کئے ہیں شمشیریں
غلام قوم تجھے کچھ حیا بھی آتی ہے
ہیں تیرے چاند یہ خاک افگنی کی تدبیریں
ترا چراغ سر شام بجھ گیا لیکن
سحر کے بھیس میں پھیلیں گی اس کی تنویریں
مرے شہید ترے نام پاک سے قومیں
کریں گی آیۂ حب وطن کی تفسیریں
پیام سعیٔ سرافرازیٔ وطن ہے تو
شہید و غازی و جرار و صف شکن ہے تو
سیاست وطنی کی فضا تھی زہر آلود
ہوائے غرب تھی ناسازگار و نا مسعود
صباح دولت تیموریہ کی آئی تھی شام
پڑا تھا نیر اقبال ہند سر بہ سجود
گلوں کو لوریاں دیتا تھا اعتبار بہار
چمن میں سبزۂ بیگانہ پا رہا تھا نمود
ہے تیرے بعد تری یاد افتخار وطن
ترا مزار ہے شمع سر مزار وطن
پکارتی ہیں سرنگا پٹم کی دیواریں
کہ ہم کو یاد ہیں وہ گولیوں کی بوچھاریں
دہن کشادہ ہیں چوٹوں کے گھاؤ کیا معلوم
یہ کب حمیت حب وطن کو للکاریں
شہید زندۂ جاوید ہیں وہی ساونت
جو نام پاک وطن پر لڑیں مریں ماریں
اس ایک جان گرامی پہ لاکھ جاں صدقے
اس ایک موت پہ سو عمر جاوداں صدقے
اجتبا رضوی 
(4044) ووٹ وصول ہوئے
Tipu-sultan In Urdu By Famous Poet Ijtiba Rizvi. Tipu-sultan is written by Ijtiba Rizvi. Enjoy reading Tipu-sultan Poem on Inspiration for Students, Youth, Girls and Boys by Ijtiba Rizvi. Free Dowlonad Tipu-sultan by Ijtiba Rizvi in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends