Achchhe Dinon Ki Aas Laga Kar Maine KHud Ko Roka Hai
achchhe dinon ki aas laga kar main ne KHud ko roka hai
kaise kaise KHwab dikha kar main ne KHud ko roka hai
main ne KHud ko roka hai jazbaat ki rau mein bahne se
dil mein sau arman daba kar main ne KHud ko roka hai
furqat ke mausam mein kaise zinda hun tum kya jaano
kaise is dil ko samjha kar main ne KHud ko roka hai
chhoD ke sab kuchh tum se milne aa jaana dushwar nahin
mustaqbil ka KHauf dila kar main ne KHud ko roka hai
kaTte kahan hain hijr ke lamhe phir bhi ek zamane se
teri yaadon se bahla kar main ne KHud ko roka hai
wapas jaane ke sab raste main ne KHud masdud kiye
kashti aur patwar jala kar main ne KHud ko roka hai
jab bhi main ne chaha 'raghib' dushman par yalghaar karun
KHud ko apne samne pa kar main ne KHud ko roka hai
Iftikhar Raghib 
(945) Peoples Rate This