Meri Aankhon Ko Aankhon Ka Kinara Kaun Dega
meri aankhon ko aankhon ka kinara kaun dega
samundar ko samundar mein sahaara kaun dega
mere chehre ko chehra kab inayat kar rahe ho
tumhein mere siwa chehra tumhaara kaun dega
mere dariya ne apne hi kinare kaT Dale
bipharte paniyon ko ab sahaara kaun dega
badan mein ek sahra jal raha hai bujh raha hai
mere dariyaon ko pahla ishaara kaun dega
mohabbat nila mausam ban ke aa jaegi ek din
gulabi titliyon ko phir sahaara kaun dega
Iftikhar Qaisar 
(1137) Peoples Rate This