Raat Bhar Dard Ki Barsat Mein Dhoi Hui Subh
raat bhar dard ki barsat mein dhoi hui subh
sab ki aankhon mein hai jaise koi roi hui subh
pak jazbon ke samundar se nithaara hua nur
nek sochon ki biloni se biloi hui subh
phul be-rang faza zard parinde KHamosh
sham ki god mein thak-haar ke soi hui subh
kaun dekhega mere ashk ko suraj bante
kaun kaTega meri aankh ki boi hui subh
yun bhi lauTenge watan ko kabhi hum hijr-nasib
DhunDhti hogi hamein bhi koi khoi hui subh
Iftikhar Bukhari 
(909) Peoples Rate This