Ek Sawal
mere aaba-o-ajdad ne hurmat-e-admi ke liye
ta-abad raushni ke liye
kalma-e-haq kaha
maqtalon qaid-KHanon salibon mein bahta lahu un ke hone ka ailan karta raha
wo lahu hurmat-e-admi ki zamanat bana
ta-abad raushni ki alamat bana
aur main pa-barahna sar-e-kucha-e-ehtiyaj
rizq ki maslahat ka asir aadmi
sochta rah gaya
jism mein mere un ka lahu hai to phir ye lahu bolta kyun nahin?
Iftikhar Arif 
(1061) Peoples Rate This