Main Kuchh Dinon Mein Use ChhoD Jaane Wala Tha
main kuchh dinon mein use chhoD jaane wala tha
jahaz gharq hua jo KHazane wala tha
gulon se bu-e-shikast uTh rahi hai naghmagaro
yahin kahin koi kuze banane wala tha
ajib haal tha is dasht ka main aaya to
na KHak thi na koi KHak uDane wala tha
tamam dost alaw ke gird jama the aur
har ek apni kahani sunane wala tha
kahani jis mein ye duniya nai thi achchhi thi
aur is pe waqt bura waqt aane wala tha
bas ek KHwab ki duri pe tha wo shahr jahan
main apne nam ka sikka chalane wala tha
shajar ke sath mujhe bhi hila gaya 'babar'
wo saneha jo use pesh aane wala tha
Idris Babar 
(1092) Peoples Rate This