جھلسی سی اک بستی میں
ہاں دیکھا کل ہم نے اس کو دیکھنے کا جسے ارماں تھا
وہ جو اپنے شہر سے آگے قریۂ باغ و بہاراں تھا
سوچ رہا ہوں جنگ سے پہلے، جھلسی سی اس بستی میں
کیسا کیسا گھر کا مالک، کیسا کیسا مہماں تھا
سب گلیوں میں ترنجن تھے اور ہر ترنجن میں سکھیاں تھیں
سب کے جی میں آنے والی کل کا شوق فراواں تھا
میلوں ٹھیلوں باجوں گاجوں باراتوں کی دھومیں تھیں
آج کوئی دیکھے تو سمجھے، یہ تو سدا بیاباں تھا
چاروں جانب ٹھنڈے چولھے، اجڑے اجڑے آنگن ہیں
ورنہ ہر گھر میں تھے کمرے، ہر کمرے میں ساماں تھا
اجلی اور پر نور شبیہیں روز نماز کو آتی تھیں
مسجد کے ان طاقوں میں بھی کیا کیا دیا فروزاں تھا
اجڑی منڈی، لاغر کتے، ٹوٹے کھمبے خالی کھیت
کیا اس نہر کے پل کے آگے ایسا شہر خموشاں تھا
آج کہ اک روٹی کی خاطر کارڈ دکھاتا پھرتا ہے
پورے کمپ کو روٹی دے دے ایسا ایسا دہقاں تھا
تاب نہیں ہر ایک سے پوچھیں بابا تجھ پر کیا گزری
ایک کو روک کے پوچھا ہم نے، سینہ اس کا بریاں تھا
بولا لوگ تو آئیں جائیں بستی کو پھر بسنا ہے
میرے تنکوں کی خاطر آیا سارا طوفاں تھا
آگ کے اندر اور تپش ہے، آگ کے باہر اور ہی آنچ
شاید کوئی دوانا ہوگا بے شک چاک گریباں تھا
ابن انشاؔ 
(1255) ووٹ وصول ہوئے
Jhulsi Si Ek Basti Mein In Urdu By Famous Poet Ibn E Insha. Jhulsi Si Ek Basti Mein is written by Ibn E Insha. Enjoy reading Jhulsi Si Ek Basti Mein Poem on Inspiration for Students, Youth, Girls and Boys by Ibn E Insha. Free Dowlonad Jhulsi Si Ek Basti Mein by Ibn E Insha in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends