Kis Ko Par Utara Tumne Kis Ko Par Utaroge
kis ko par utara tum ne kis ko par utaroge
mallaho tum pardesi ko bich bhanwar mein maroge
munh dekhe ki miThi baaten sunte itni umr hui
aankh se ojhal hote hote ji se hamein bisaroge
aaj to hum ko pagal kah lo patthar phenko tanz karo
ishq ki bazi khel nahin hai kheloge to haaroge
ahl-e-wafa se tark-e-talluq kar lo par ek baat kahen
kal tum in ko yaad karoge kal tum inhen pukaroge
un se hum se pyar ka rishta ai dil chhoDo bhul chuko
waqt ne sab kuchh meT diya hai ab kya naqsh ubhaaroge
'insha' ko kisi soch mein Dube dar par baiThe der hui
kab tak us ke baKHt ke badle apne baal sanwaroge
Ibn E Insha 
(1013) Peoples Rate This