Harf-e-inkar Ki Iqrar-e-wafa Tha Kya Tha
harf-e-inkar ki iqrar-e-wafa tha kya tha
KHat mein ek jumla-e-mubham sa likha tha kya tha
us ka chehra tha qamar tha ki tasawwur mera
kal munDeri pe koi jalwa-numa tha kya tha
yak-ba-yak ho gaya ojhal wo nazar ke aage
dhund ka ek bagula sa uTha tha kya tha
muskuraata tha magar aankh bhi nam thi us ki
us ke sine mein koi dard chhupa tha kya tha
subh tak luT gaya sindur kai mangon ka
shab ke sannaTe mein ek shor uTha tha kya tha
bad-dua thi ki dua ye wahi jaane 'hasrat'
zer-e-lab us ne magar kuchh to kaha tha kya tha
Hasrat Deobandi 
(780) Peoples Rate This