Tu Nahin Hai To Tere Hamnam Se Rishta Rakkha
tu nahin hai to tere hamnam se rishta rakkha
hum ne yun bhi dil-e-nakaam ko zinda rakkha
wo mari jaan ka dushman ki sar-e-nahr-e-visal
sab ko sairab kiya bas mujhe pyasa rakkha
mere maula teri mantiq bhi ajab mantiq hai
honT pe pyas rakhi aankh mein dariya rakkha
sab ke hathon ki lakiron mein muqaddar rakh ke
rakhne wale ne mere hath pe sahra rakkha
sab ke sab luT rahe the teri daulat rani
main ne to sirf tere shahr ka naqsha rakkha
jis bulandi pe 'raza' main ne sajae tamghe
us bulandi pe hi TuTa hua kasa rakkha
Hashim Raza Jalalpuri 
(1003) Peoples Rate This