Mohabbat Ka Ajab Zawiya Hai
mohabbat ka ajab zawiya hai
hawaen chaar-su aur ek diya hai
hum ahl-e-dard KHud se puchhte hain
watan ko hum ne ab tak kya diya hai
sitamgar ke sitam itne baDhe hain
labon ko aaj hum ne si liya hai
achanak bol uThe diwar-o-dar bhi
ye kis ka nam main ne le liya hai
tumhaare KHwab aaKHir kya hue hain
haqiqat-ashna kis ne kiya hai
tumhaari pyas kyun bujhti nahin hai
ye kis ki ok se pani piya hai
meri aankhon se aansu kis ne ponchhe
gareban chaak ye kis ne siya hai
sabhi ko lauTna hai ek na ek din
'hasan' duniya mein kaun itna jiya hai
Hasan Rizvi 
(1001) Peoples Rate This