Dasht Mein Phul Khila Rakkha Hai
dasht mein phul khila rakkha hai
hum ne dil dil se mila rakkha hai
teri KHatir tujhe malum kahan
hum ne kis kis ko bhula rakkha hai
bas tera zikr nai fikr ke sath
hijr mein aur to kya rakkha hai
kya KHabar aaj hi kar Dalen hum
kaam jo kal pe uTha rakkha hai
is ne rakkha hai sukun neki mein
aur gunahon mein maza rakkha hai
aaina dekh rahe ho ya phir
KHud ko taswir bana rakkha hai
bair us ko hi charaghon se hua
nam jis ne bhi hawa rakkha hai
faqat apni na rahi fikr 'jamil'
hum ne tera bhi pata rakkha hai
Hasan Jameel 
(744) Peoples Rate This