Un Ka Jalwa Nahin Dekha Jata
un ka jalwa nahin dekha jata
dekh dekha nahin dekha jata
qatl karne ki wo jaldi thi tumhein
ab taDapna nahin dekha jata
chashm-e-KHun-bar KHuda rahm kare
tera rona nahin dekha jata
ulfat unki nahin chhoDi jati
haal dil ka nahin dekha jata
dekhne hi ke liye hain aankhen
un se kya kya nahin dekha jata
par teri barq-e-tajalli ka jamal
KHub dekha nahin dekha jata
nama pura wo 'hasan' kya dekhen
nam pura nahin dekha jata
Hasan Barelvi 
(779) Peoples Rate This