Ishq Se Ijtinab Kar Lena
ishq se ijtinab kar lena
apni miTTi KHarab kar lena
hum ne duniya ko KHub jhela hai
hum se kuchh iktisab kar lena
bebasi se najat mil jae
phir sawal-o-jawab kar lena
chhoD izzat-maab logon ko
KHud ko aali-janab kar lena
kal tujhe kuchh gunah karne hain
aaj kar-e-sawab kar lena
is ko bhar lena apni aankhon mein
ek haqiqat ko KHwab kar lena
kya kami hai hasin chehron ki
phir naya intiKHab kar lena
tum sar-e-am ek din 'hamid'
ruh ko be-naqab kar lena
hama-tan-gosh hai ye virani
yar 'hamid' KHitab kar lena
Hamid Iqbal Siddiqui 
(2175) Peoples Rate This