Ek Mujassam Dard Hun Ek Aah Hun
ek mujassam dard hun ek aah hun
phir bhi zeb-o-zinat-e-afwah hun
main ne duniya ki pasand oDhi nahin
kuchh bhi hun phir bhi to haq-agah hun
sadd-e-lahm-o-ustuKHwan hote hue
har nafas ab bhi tere hamrah hun
karb wahshat gham masail ke tufail
aaj tak zinda ba-hamdillah hun
mere naqsh-e-pa se nikle raste
log phir bhi kahte hain gumrah hun
parwarish pati hai jis se tirgi
main wahi farzand-e-mehr-o-mah hun
mai-kade ki rah se tujh ko pa liya
log kahte hain ki main gumrah hun
Hamdoon Usmani 
(915) Peoples Rate This