Har ChoT Par Zamane Ki Hum Muskurae Hain
har choT par zamane ki hum muskurae hain
lekin tere KHayal mein aansu bahae hain
had ko pahunch gai hai meri na-mardiyan
manzil ke pas aa ke qadam Dagmagae hain
ai zulf-e-kaenat tujhe kya KHabar ki hum
kin pech o KHam se chhuT ke tere pas aae hain
ai jaan-e-kaenat tere intizar mein
hum ne kai charagh jalae bujhae hain
jo chal paDe the azm-e-safar le ke thak gae
jo laDkhaDa rahe the wo manzil pe aae hain
'hairat' nizam-e-kohna ki tarikiyon mein bhi
hum ne nizam-e-taza ke dipak jalae hain
Hairat Saharvardi 
(719) Peoples Rate This