Patthar Mein Fan Ke Phul Khila Kar Chala Gaya
patthar mein fan ke phul khila kar chala gaya
kaise amiT nuqush koi chhoDta gaya
simTa tera KHayal to gul-rang ashk tha
phaila to misl-e-dasht-e-wafa phailta gaya
sochon ki gunj thi ki qayamat ki gunj thi
tera sukut hashr ke manzar dikha gaya
ya teri aarzu mujhe le aai is taraf
ya mera shauq rah mein sahra bichha gaya
wo jis ko bhulne ka tasawwur muhaal tha
wo ahd rafta rafta mujhe bhulta gaya
jab us ko pas-e-KHatir-e-azurdagan nahin
muD muD ke kyun wo dur talak dekhta gaya
Hafiz Taib 
(932) Peoples Rate This