Har Sher Ghazal Ka Kah Raha Hai
har sher ghazal ka kah raha hai
tujh ko bhi bichhaD ke dukh hua hai
hai shola-e-jaan mein yaad teri
kya aag mein phul khil raha hai
KHurshid-e-sahar tulua ho kar
shabnam ka mizaj puchhta hai
kya us ko bataun hijr ke gham
jis par mera haal aaina hai
main kis se kahun fasana-e-gham
har ek ka dil dukha hua hai
kyun aa gai darmiyan duniya
ye tera mera moamla hai
kya paoge but se faiz 'hafiz'
patthar bhi kahin KHuda bana hai
Hafiz Ludhiyanvi 
(874) Peoples Rate This