Baad-e-saba Ye Zulm KHuda-ra Na Kijiyo
baad-e-saba ye zulm KHuda-ra na kijiyo
is bewafa se zikr hamara na kijiyo
gham ki kami nahin hai jahan-e-KHarab mein
ai dil taras taras ke guzara na kijiyo
ai sahab-e-uruj tu baam-e-uruj se
suraj ke Dubne ka nazara na kijiyo
aisa na ho ki log hamein pujne lagen
itna bhi ehtiram hamara na kijiyo
sahil agar nasib bhi ho jae ai 'hafiz'
tufan se bhul kar bhi kinara na kijiyo
Hafeez Merathi 
(1432) Peoples Rate This