Na Kar Dil-jui Ai Sayyaad Meri
na kar dil-jui ai sayyaad meri
ki fitrat hai bahut aazad meri
asiri se rihai pane walo
tumhein pahunche mubarakbaad meri
sahaara kyun liya tha naKHuda ka
KHuda bhi kyun kare imdad meri
bhula do mujh ko lekin yaad rakhna
sataegi tumhein bhi yaad meri
farishte kya murattab kar sakenge
bahut be-rabt hai rudad meri
pasand aane lagi thi sar-bulandi
yahi thi awwalin uftad meri
kya paband-e-nai nale ko main ne
ye tarz-e-KHas hai ijad meri
mere ashaar par chup rahne wale
tere hisse mein aai dad meri
qaza ka zulm had se baDh gaya hai
koi sunta nahin fariyaad meri
KHudawanda qaza ne chhin li hai
mere aaghosh se 'irshad' meri
Hafeez Jalandhari 
(916) Peoples Rate This