Jahan Qatre Ko Tarsaya Gaya Hun
jahan qatre ko tarsaya gaya hun
wahin Duba hua paya gaya hun
ba-haal-e-gumrahi paya gaya hun
haram se dair mein laya gaya hun
bala kafi na thi ek zindagi ki
dobara yaad farmaya gaya hun
ba-rang-e-lala-e-virana bekar
khilaya aur murjhaya gaya hun
agarche abr-e-gauhar-bar hun main
magar aankhon se barsaya gaya hun
supurd-e-KHak hi karna tha mujh ko
to phir kahe ko nahlaya gaya hun
farishte ko na main shaitan samjha
natija ye ki bahkaya gaya hun
koi sanat nahin mujh mein to phir kyun
numaish-gah mein laya gaya hun
ba-qaul-e-barhaman qahr-e-KHuda hun
buton ke husn par Dhaya gaya hun
mujhe to is KHabar ne kho diya hai
suna hai main kahin paya gaya hun
'hafiz' ahl-e-zaban kab mante the
baDe zoron se manwaya gaya hun
Hafeez Jalandhari 
(4932) Peoples Rate This