Dard Sa UTh Ke Na Rah Jae Kahin Dil Ke Qarib
dard sa uTh ke na rah jae kahin dil ke qarib
meri kashti na kahin gharq ho sahil ke qarib
wajd mein ruh hai aur raqs mein hai pa-e-talab
dekhiye haal mere shauq ka manzil ke qarib
rah gaya tha jo kabhi pa-e-talab mein chubh kar
ab wahi KHar-e-tamanna hai rag-e-dil ke qarib
ab wo piri mein kahan ahd-e-jawani ki umang
rang maujon ka badal jaata hai sahil ke qarib
jazba-e-shauq bhi kuchh kaam na aaya 'hadi'
na-tawani ne biThaya mujhe manzil ke qarib
Hadi Machlishahri 
(725) Peoples Rate This