Aur Sab Bhul Gae Harf-e-sadaqat Likhna
aur sab bhul gae harf-e-sadaqat likhna
rah gaya kaam hamara hi baghawat likhna
lakh kahte rahen zulmat ko na zulmat likhna
hum ne sikha nahin pyare ba-ijazat likhna
na sile ki na sataish ki tamanna hum ko
haq mein logon ke hamari to hai aadat likhna
hum ne jo bhul ke bhi shah ka qasida na likha
shayad aaya isi KHubi ki badaulat likhna
is se baDh kar meri tahsin bhala kya hogi
paDh ke na-KHush hain mera sahib-e-sarwat likhna
dahr ke gham se hua rabt to hum bhul gae
sarw qamat ko jawani ko qayamat likhna
kuchh bhi kahte hain kahin shah ke musahib 'jalib'
rang rakhna yahi apna isi surat likhna
Habib Jalib 
(3449) Peoples Rate This