Na Betabi Na Aashufta-sari Hai
na betabi na aashufta-sari hai
hamari zindagi kya zindagi hai
fareb-e-arzu khaen to kyun kar
taghaful hai na begana-washi hai
farogh-e-ishq hai mahrumiyon se
wafa-keshi ba-qadr-e-na-rasi hai
mere qasr-e-tamanna ki nigahban
nigah-e-naz ki beganagi hai
mohabbat ke siwa jada na manzil
mohabbat ke siwa sab gumrahi hai
mohabbat mein shikayat kya gila kya
mohabbat bandagi hai bandagi hai
KHuda bar-haq magar is ko karen kya
buton mein sad-fusun-e-dilbari hai
mujhe nafrat nahin jannat se lekin
gunahon mein ajab ek dilkashi hai
na do hur-o-mai-o-kausar ke tane
ki zahid bhi to aaKHir aadmi hai
Habeeb Ahmad Siddiqui 
(690) Peoples Rate This