Kitni Sadiyan Na-rasi Ki Intiha Mein Kho Gain
kitni sadiyan na-rasi ki intiha mein kho gain
be-jahat naslon ki aawazen KHala mein kho gain
rang-o-bu ka shauq aashob-e-hawa mein le gaya
titliyan ghar se nikal kar ibtila mein kho gain
kaun pas-e-manzar mein ujDe paikaron ko dekhta
shahar ki nazren libas-e-KHushnuma mein kho gain
muntazir chaukhaT pe tabiron ke shahzade rahe
KHwab ki shahzadiyan qasr-e-dua mein kho gain
sanp ne un ke nasheman mein basera kar liya
peD se chiDiyon ki mahkaren faza mein kho gain
koi kya bab-e-aman aafat-zadon par kholta
dastaken gulzar tufan ki sada mein kho gain
Gulzar Bukhari 
(936) Peoples Rate This