Dil Jalane Se Kahan Dur Andhera Hoga
dil jalane se kahan dur andhera hoga
raat ye wo hai ki mushkil se sawera hoga
kyun na ab waz-e-junun tark karen lauT chalen
us se aage jo hai jangal wo ghanera hoga
ye zaruri to nahin itna bhi KHush-fahm na ban
wo zamana jo na mera hai na tera hoga
itna bhi sang-e-malamat se Dara mat naseh
sar salamat hai to is shahr ka phera hoga
KHidmat-e-raj-mahal par unhen dekha mamur
jo ye kahte the ki sardar basera hoga
rah-e-pur-pech ko sahl itna batane wala
rahbar ho nahin sakta hai luTera hoga
wo bhi insan hai ai dil use ilzam na de
jaane us ko bhi kin aafat ne ghera hoga
Gopal Mittal 
(1197) Peoples Rate This