Jhalakti Hai Meri Aankhon Mein Bedari Si Koi
jhalakti hai meri aankhon mein bedari si koi
dabi hai jaise KHakistar mein chingari si koi
taDapta tilmilata rahta hun dariya ki manind
paDi hai zarb ehsasat par kari si koi
na jaane qaid mein hun ya hifazat mein kisi ki
khinchi hai har taraf ek chaar diwari si koi
kisi bhi moD se mera guzar mushkil nahin hai
mere pairon tale rahti hai hamwari si koi
guman hone laga jab se mujhe qad-awari ka
chala karti hai mere panw par aari si koi
kisi mahfil kisi tanhai mein rukna hai mushkil
mujhe khinche liye jati hai be-zari si koi
Ghulam Murtaza Rahi 
(685) Peoples Rate This