Suraj Ko Kya Pata Hai Kidhar Dhup Chahiye
suraj ko kya pata hai kidhar dhup chahiye
aangan baDa hai apne bhi ghar dhup chahiye
aaine TuT TuT ke bikhre hain chaar-su
DhunDenge aks aks magar dhup chahiye
bhige hue paron se to uDne na paenge
kaTun na un parindon ke par dhup chahiye
hum se darida-pairahan-o-jaan ke waste
yaqut chahiye na guhar dhup chahiye
suraj na jaane kaun si wadi mein chhup gaya
aur chiKHti phire hai sahar dhup chahiye
ek nind hai ki aankh se lag kar nikal gai
ab raat ka tawil safar dhup chahiye
pani pe chahe naqsh banae koi 'matin'
kaghaz pe main banaun magar dhup chahiye
Ghayas Mateen 
(730) Peoples Rate This