Sar Par Koi Aasman Rakh De
sar par koi aasman rakh de
ek munh mein magar zaban rakh de
aa sulh nahin salam to le
ye tir chaDhi kaman rakh de
itna bhi na be-lihaz ho ja
thoDa sa to KHush-guman rakh de
tujh ko teri hikmaten mubarak
ek hath pe ek jahan rakh de
phir hum ko gada-e-rah bana kar
rah mein koi imtihan rakh de
tafsil kahin garan na paD jae
ek harf mein dastan rakh de
ab dhyan ki baat chhiD gai to
kuchh is se alag bhi dhyan rakh de
Gauhar Hoshiyarpuri 
(1066) Peoples Rate This