Apne Gham Ka Mujhe Kahan Gham Hai

apne gham ka mujhe kahan gham hai

ai ki teri KHushi muqaddam hai

aag mein jo paDa wo aag hua

husn-e-soz-e-nihan mujassam hai

us ke shaitan ko kahan taufiq

ishq karna gunah-e-adam hai

dil ke dhaDkon mein zor-e-zarb-e-kalim

kis qadar is habab mein dam hai

hai wahi ishq zinda-o-jawed

jise aab-e-hayat bhi sam hai

is mein Thahraw ya sukun kahan

zindagi inqalab-e-paiham hai

ek taDap mauj-e-tah-nashin ki tarah

zindagi ki bina-e-mohkam hai

rahti duniya mein ishq ki duniya

nae unwan se munazzam hai

uThne wali hai bazm mazi ki

raushni kam hai zindagi kam hai

ye bhi nazm-e-hayat hai koi

zindagi zindagi ka matam hai

ek muamma hai zindagi ai dost

ye bhi teri ada-e-mubham hai

ai mohabbat tu ek azab sahi

zindagi be tere jahannam hai

ek talatum sa rang-o-nikhat ka

paikar-e-naz mein dama-dam hai

phirne ko hai rasili nim-nigah

aahu-e-naz mail-e-ram hai

rup ke jot zer-e-pairahan

gulsitan par rida-e-shabnam hai

mere sine se lag ke so jao

palken bhaari hain raat bhi kam hai

aah ye mehrbaniyan teri

shadmani ki aankh pur-nam hai

narm o doshiza kis qadr hai nigah

har nazar dastan-e-maryam hai

mehr-o-mah shola-ha-e-saz-e-jamal

jis ki jhankar itni maddham hai

jaise uchhle junun ki pahli sham

is ada se wo zulf barham hai

yun bhi dil mein nahin wo pahli umang

aur teri nigah bhi kam hai

aur kyun chheDti hai gardish-e-charKH

wo nazar phir gai ye kya kam hai

ru-kash-e-sad-harim-e-dil hai faza

wo jahan hain ajib aalam hai

diye jati hai lau sada-e-'firaq'

han wahi soz-o-saz kam kam hai