Use Malum Hai Main Sar-phira Hun
use malum hai main sar-phira hun
magar KHush hai ki us ko chahta hun
ye basti kab darindon se thi KHali
main phir bhi Thik logon mein raha hun
jo chahe wo mujhe be-dam le le
KHaridaron ke hathon kam bika hun
teri chahat bahana hai yaqin kar
ba-har surat main KHud ko chahta hun
zara sun be-niyaz-e-lams sun le
main tujh ko chhu ke KHud ko bhulta hun
kahan toDa hai main ne shaKH se gul
main shaKH-e-gul pe gul ko manta hun
Fazl Tabish 
(820) Peoples Rate This