Wasl Ke Lamhe Kahani Ho Gae
wasl ke lamhe kahani ho gae
shab ke moti subh pani ho gae
rafta rafta zindagani ho gae
gham ke lamhe jawedani ho gae
daulat-e-ahd-e-jawani ho gae
chand lamhe jo kahani ho gae
kaisi kuchh ranginiyan thin jin se hum
mahw-e-sair-e-dahr-e-fani ho gae
sukh bhare dukh dukh bhare sukh sab ke sab
waqiat-e-zindagani ho gae
muskurae aap jaane kis liye
hum rahin-e-shadmani ho gae
baaton hi baaton mein raaten uD gain
hae wo din bhi kahani ho gae
tum ne kuchh dekha KHulus-e-jazb-e-shauq
sang-reze gul ke pani ho gae
'farhat' aisi but-parasti ke nisar
but bhi mahw-e-lan-tarani ho gae
Farhat Kanpuri 
(765) Peoples Rate This