Urdu
urdu zaban hamari
hai jaan o dil se pyari
ye madari zaban hai
rag rag mein jo rawan hai
jab se zaban kholi
urdu hai apni boli
bachpan ki hai ye sathi
ki is ne zehn-sazi
shirin zaban hai urdu
charcha hai is ka har-su
urdu mein naghmagi hai
kya is mein dil-kashi hai
urdu jo koi bole
kanon mein ras ye ghole
urdu mein paDhna likhna
baat is zaban mein karna
urdu ko zinda rakhna
hum par hai farz apna
lab jo 'faragh' kholo
urdu mein tum bhi bolo
Faragh Rohvi 
(1461) Peoples Rate This