Ai Sanam Der Na Kar Anjuman-ara Ho Ja
ai sanam der na kar anjuman-ara ho ja
meri dam toDti nazron ka sahaara ho ja
apne daman mein chhupa le mujhe mahbub mere
meri bigDi hui qismat ka sitara ho ja
ishq sachcha hai to phir rang-e-dui Thik nahin
hum tere ho gae ab tu bhi hamara ho ja
mujh ko har waqt hai lazzat-e-didar-e-sanam
meri nazron ke liye aisa sahaara ho ja
meri chahat ka do-alam mein bharam rah jae
tu mujhe meri mohabbat se pyara ho ja
us ko pana hai to kashti se kinara kar le
Dub kar bahr-e-mohabbat ka kinara ho ja
hun 'fana' ishq mein tere tera kahlata hun
meri taqdir badal mera sahaara ho ja
Fana Bulandshahri 
(923) Peoples Rate This