August1955
shahr mein chaak-gareban hue napaid ab ke
koi karta hi nahin zabt ki takid ab ke
lutf kar ai nigah-e-yar ki gham walon ne
hasrat-e-dil ki uThai nahin tamhid ab ke
chand dekha teri aankhon mein na honTon pe shafaq
milti-julti hai shab-e-gham se teri did ab ke
dil dukha hai na wo pahla sa na jaan taDpi hai
hum hi ghafil the ki aai hi nahin id ab ke
phir se bujh jaengi shamen jo hawa tez chali
la ke rakkho sar-e-mahfil koi KHurshid ab ke
Faiz Ahmad Faiz 
(2416) Peoples Rate This