Jo Mujh Mein Chhupa Mera Gala GhonT Raha Hai
jo mujh mein chhupa mera gala ghonT raha hai
ya wo koi iblis hai ya mera KHuda hai
jab sar mein nahin ishq to chehre pe chamak hai
ye naKHl KHizan aai to shadab hua hai
kya mera ziyan hai jo muqabil tere aa jaun
ye amr to malum ki tu mujh se baDa hai
main banda-o-nachaar ki sairab na ho paun
ai zahir-o-maujud mera jism dua hai
han us ke taaqub se mere dil mein hai inkar
wo shaKHs kisi ko na milega na mila hai
kyun nur-e-abad dil mein guzar kar nahin pata
sine ki siyahi se naya harf likha hai
(9093) Peoples Rate This