KHuban Ke Bich Jaanan Mumtaz Hai Sarapa
KHuban ke bich jaanan mumtaz hai sarapa
andaz-e-dilbari mein ejaz hai sarapa
pal pal maTak ke dekhe Dag Dag chale laTak ke
wo shoKH chhal chhabila tannaz hai sarapa
tirchhi nigah karna katra ke baat sunna
majlis mein aashiqon ki andaz hai sarapa
nainon mein us ki jadu zulfan mein us ki phanda
dil ke shikar mein wo shahbaz hai sarapa
ghamza nigah taghaful ankhiyan siyah o chanchal
ya rab nazar na lage andaz hai sarapa
us ke KHiram upar taus mast haiga
wo mir dil-rababi tannaz hai sarapa
kisht-e-ummid karta sarsabz sabza-e-KHat
anjam-e-husn us ka aaghaz hai sarapa
waqt-e-nazara 'faez' dildar ka yahi hai
bistar nahin badan par tan-baz hai sarapa
Faez Dehlvi 
(947) Peoples Rate This