Jab Kabhi Dard Ki Taswir Banane Nikle
jab kabhi dard ki taswir banane nikle
zaKHm ki tah mein kai zaKHm purane nikle
chain milta hai tere shauq ko pura kar ke
warna ai laKHt-e-jigar kaun kamane nikle
waqt ki gard mein paiwast the sab zaKHm mere
jab chali tez hawa lakh fasane nikle
ye kisi taur bhi allah ko manzur nahin
ki tu ehsan kare aur jatane nikle
pahle nafrat ki wo diwar girae 'ahya'
phir mohabbat ka naya shahr basane nikle
Ehya Bhojpuri 
(1178) Peoples Rate This